人大咗會發覺，細個嗰陣識落嘅一大班朋友；最後依然留喺你身邊嘅，永遠都係嗰兩三個好朋友。
有啲朋友以前曾經同你好親密，每日都會聯絡，佢可能係你嘅舊同學或者返兼職識嘅朋友，當時你以為你哋永遠都會咁friend。不過轉左環境之後，兩個人就少咗見面，傾偈嘅內容同共同話題都冇以前咁多；
更加令人無奈嘅係，你發現兩個人嘅價值觀相差越嚟越遠，好似處理危機嘅方法又或者對社會事件嘅睇法，對方嘅思想可能仲停留係中學嘅階段，諗嘢比較簡單、處事亦好衝動；而你經過職場上嘅洗禮，做事變得圓滑同埋成熟，睇嘢比較宏觀同埋長遠。
兩個人無發生過爭執，唔再聯絡亦都唔係因為變成仇人，只係大家諗嘢嘅方式唔同，好難去理解同埋明白對方。
夜深人靜嘅時候，你可能會為呢段逝去嘅友誼感到嘆息，諗返起當初大家都好真心相處。不過朋友都好講緣份，大家生活嘅節奏唔一樣就好難維繫到友誼。
「問我有沒有 確實也沒有
一直躲避的藉口 非甚麼大仇
為何舊知己 在最後變不到老友
不知你是我敵友 已沒法望透
被推著走 跟著生活流
來年陌生的 是昨日最親的某某」
歌曲：最佳損友
歌手：陳奕迅
作詞：黃偉文
作曲：Eric Kwok
Search